Зміцер Панкавец, Ірына Арахоўская: Дваццаць кніг, якія абавязкова трэба набыць на Мінскім кніжным кірмашы

8 лютага ў будынку «Белэкспа» пачаў Мінскі кніжны кірмаш. Больш за паўсотню выдавецтваў прадстаўляюць тут сваю прадукцыю. Найлепш прадстаўленыя, натуральна, беларускія стэнд і расійскія.

«Наша Ніва» ўжо пісала пра антылітаратуру, якой таксама навезлі ў Мінск. Аднак на кірмашы ёсць вельмі шмат добрых кніг, якія прадаюцца па цэнах ніжэйшых, чым звычайна ў крамах.

«Наша Ніва» прапануе рэйтынг самых цікавых выданняў, што можна знайсці на развалах «Белэкспа».

Святланы Алексіевіч, «Час second-hand», «Цынкавыя хлопчыкі» і іншыя

Цана: ад 13 да 15 рублёў

Пяць кніг Нобелеўскага лаўрэата па літаратуры 2015 года Святланы Алексіевіч прадаецца на стэндзе расійскага выдавецтва «Время». Купіць па такіх цэнах кнігі пісьменніцы на сёння ў Мінску немагчыма. А ў суботу 11-га лютага а 11 гадзіне наведнікі выставы змогуць атрымаць аўтограф ад самой лаўрэаткі.

Анатоль Бутэвіч, «Як Данік у Радзівілаўскае метро трапіў»

Цана: 4,95 рублёў

На стэндзе выдавецтва «Мастацкая літаратура» было прадстаўлена троху выданняў на беларускай мове для дзяцей. Напрыклад, кніга былога міністра культуры Анатоля Бутэвіча. Кніга напісана ў прыгодніцкім жанры, мае добрыя ілюстрацыі. А галоўная яе мэта — расказаць аб гісторыі славутага магнацкага рода, прывіць любоў да сваёй гісторыі.

«Радзівілы. Нясвіж. Замак». У 2-х тамах

Цана: 40 рублёў

Пра Радзівілаў ёсць што пачытаць не толькі дзеткам, але і дарослым. Шыкоўны альбом «Радзівілы» выдадзены з цвёрдай вокладкай, на мелаванай паперы, каляровымі ілюстрацыямі. Праўда, на рускай, а не беларускай мове. Гэта гісторыя аднаго з самых уплывовых двароў сярэднявечнай Еўропы.

Алена Церашкова, «Англійская мова: слова за словам. Вершы»

Цана: 3,5 рублёў

Кніга для самых маленькіх беларусікаў. Аўтарка ў займальнай вершаванай форме прапануе завучваць англійскія словы. Мяркуецца, што такі падыход будзе эфектыўным па вывучэнню як беларускай, гэтак і англійскай. Кніга мае багата ілюстрацый.

Язэп Драздовіч, «Праз церні да зорак»

Цана: 19 рублёў

Абсалютна шыкоўнае 543-хстаронкавае выданне. У кнігу, укладзеную літаратуразнаўцам Міхасём Казлоўскім, увайшлі ўспаміны вядомых людзей пра яго. Тут сама літаратурныя творы Драздовіча, яго дзённік, а таксама, безумоўна, карціны. Мастак Пятро Сергіевіч называў Драздовіча «беларускім да Вінчы». Такую кнігу нікому не будзе сорамна паставіць на сваю паліцу.

Ціма Парвела, «Эла і сябры»

Цана: 10,5 рублёў

Пераклад з фінскай дзіцячай кнігі выканала Алена Казлова. «Нашы пісьменнікі так не пішуць. Бывае адкрыеш беларускага аўтара — і ведаеш, што будзе далей, а тут да апошняга трымаецца інтрыга. І хоць я даўно выйшаў з дзіцячага ўзросту, але кнігу чытаў з захапленнем», — так прадставіў выданне паэт Віктар Шніп. На прэзентацыю кнігі з Фінляндыі прыехаў сам аўтар.

Льюіс Керал, «Скрозь люстра і што ўбачыла там Аліса»

Цана: 30 рублёў

Сусветна вядомая кнігі Льюіса Кэрала цяпер даступная і па-беларуску. У кнізе маецца больш за сотню арыгінальных карцін ад мастачкі Кацярыны Дубовік. Яны павінны дапамагчы юным і не вельмі гледачам разабрацца ў тым заблытаным свеце Залюстроўя, куды трапіла Аліса.

Мікалай Улашчык, «Збор твораў». Том 1

Цана: 39 рублёў

«Гэта найлепшы беларускі гісторык ХХ стагоддзя, ніхто з ім не параўнаецца, — так прэзентуе Улашчыка рэдактар часопіса Arche Валерый Булгакаў. — Аднак пасля смерці аўтара ніхто так і не выдаў яго гістарыяграфічныя працы асобным выданнем. Выдавалася белетрыстыка, дзённікі, успаміны, але асноўныя ягоныя працы па ВКЛ, эканамічным развіцці Беларусі, не былі даступныя ў адным томе. Наша выданне закрывае гэтую лакуну».

Кнут Гамсун, «Голад»

Цана: 12,9 рублёў

«Гэта першая кніга ў серыі «Нобелеўскія лаўрэаты па-беларуску». Упершыню Гамсун выходзіць па-беларуску, перакладчыкаў з нарвежскай адзінкі, эксклюзіўная праца. Калі казаць сучаснай мовай, то «Голад» — гэта вельмі хіпстарская кніга, пра маладога чалавека, які не мае гроша, але хоча жыць прыгожа», — гаворыць ініцыятар выдання Сяргей Макарэвіч.

Уладзімір Садоўскі, «1813»

Цана: 5,9 рублёў

Гэта першы беларускі зомба-хорар. Вядомы кампазітар і грамадскі дзеяч Рэчы Паспалітай Міхал Клеафас Агінскі пачынае сваё змаганне з паўсталым мерцвякамі. Такога пазітыўнага трэшака па-беларуску вы яшчэ не чыталі.

Людміла Уліцкая, «Лесвіца Якава»

Цана: 24,5 рублёў

Калі звярнуцца да сучаснай расійскай літаратуры, то адна з найбольш яркіх зорак сённяшняга дня — гэта Людміла Уліцкая. Даўнейшы яе раман «Даніэль Штайн, перакладчык», які напісаны ў тым ліку і на беларускім матэрыяле, стаў бяспрэчным бестсэлерам. Не так даўно з’явіўся чарговы раман — «Лесвіца Якава». У цэнтры кнігі шэсць пакаленняў сям’і Асецкіх, праз якіх паказаная гісторыя Расіі апошніх 100 гадоў. «Лесвіцу Якава» рэкамендуюць і Вольскі, і Ярмошына.

Ханья Янагіхара, «Маленькае жыццё»

Цана: 22 рублі

Кніга пачынаецца тым, што чацвёра сяброў з розным колерам скуры, прыязджаюць у Нью-Ёрк, каб будаваць сваё жыццё. Гэта такая страшная казка на ноч. Раман напісаны на ўзор буйных твораў ХІХ стагоддзя.

Патрык Зюскінд, «Парфума»

Цана: 7 рублёў

Гэты раман перакладзены на паўсотні моваў, экранізаваны ў 2006 годзе. Загадкавая гісторыя Жана-Бацісты Грэнуя па-ранейшаму прыцягвае да сябе аматараў інтэлектуальнай літаратуры. Чытаючы гэтую кнігу вы адчуеце дзясяткі розных, прыемных і не вельмі, пахаў.

Саша Філіпенка, «Цкаванне», «Былы сын»

Цана: ад 8 да 11 рублёў

«Гэта не проста модны сучасны аўтар. Гэта аўтар, які піша на сур’ёзныя, балючыя тэмы, і робіць гэта так захапляльна, што аб такім драйве, стылі, напоры, можа толькі марыць сучасная папулярная літаратура», — прадставіў кнігу супрацоўнік выдавецтва «Время» Дзмітрый Гасін. Варта адзначыць, што Філіпенка мае беларускае паходжанне, хоць і жыве ў Расіі, а яго кнігі напісаны часткова на беларускім матэрыяле.

Ніл Гейман, «Караліна»

Цана: 15 рублёў

Яшчэ адна кніга па-беларуску з сусветнай класікі для дзяцей. Грошы на яе выданне збіралі ўсім светам праз краўндфандынг. «Караліна» — гэта кніга, каторую хацеў бы напісаць кожны сучасны дзіцячы пісьменнік, але Ніл Гэйман усіх апярэдзіў» — адзначае перакладчыца кнігі Дар’я Вашкевіч.

Рыгор Барадулін, «Перавыбранае»

Цана: 5 рублёў

Проста ўсё найлепшае ад класіка беларускай літаратуры пад адной вокладкай.

Беларуская мова. Самадапаможнік

Цана: 27 рублёў

Кніга выдадзеная ў Маскве і адрасуецца ў першую чаргу для жыхароў Расіі. «Дапаможнік дазваляе выпрацаваць маўленчыя навыкі, неабходныя для зносін і чытання нескладанай літаратуры, і авалодаць асновамі граматыкі: урокі дапаможніка знаёмяць і з граматычнымі асаблівасцямі мовы, і з агульнаўжывальнай гутарковай-бытавой лексікай. Асвоіўшы яе, можна без праблем выйсці з любой сітуацыі пры непасрэдных зносінах з жыхарамі Беларусі», — гаворыцца ў анатацыі. Добры падарунак для сяброў з Расіі.

Рышард Капусцінскі, «Чорнае дрэва»

Цана: 19,95 рублёў

Кнігі выдатнага польскага рэпартажыста ўжо дастаткова добра прадстаўленыя на беларускай мове. Цяпер з’явілася яшчэ адна — на гэты раз пра Афрыку. Рэвалюцыі, войны, перавароты, мясціны незвычайнай прыгажосці ўсё гэта ўраджэнец Пінска бачыў на свае вочы. Кнігі Капусцінскага захапляльныя і не банальныя.

Алесь Разанаў, «Маем найбольшае самі»

Цана: 13,5 рублёў

У год 500-годдзя беларускага кнігадрукавання куды без Францішка Скарыны? Прадмовы да скарынаўскіх кніг перастварыў у паэзію Алесь Разанаў.

Блакноты ад выдавецтва «Папуры»

Цана: 2,5 рублі

Цудоўныя невялічкія блакноты з вышыванкамі, выцінанкай і іншымі беларускімі ўзорамі. Каштуюць зусім нямнога. Камусьці можна зрабіць прыемны падарунак.
http://nn.by/?c=ar&i=185144



Categories: Літаратура

Пакінуць адказ

Fill in your details below or click an icon to log in:

WordPress.com Logo

You are commenting using your WordPress.com account. Log Out / Змяніць )

Twitter picture

You are commenting using your Twitter account. Log Out / Змяніць )

Facebook photo

You are commenting using your Facebook account. Log Out / Змяніць )

Google+ photo

You are commenting using your Google+ account. Log Out / Змяніць )

Connecting to %s

%d bloggers like this: