У Варшаве прайшоў Дзень беларускіх герояў.

Сотні беларусаў, нягледзячы на марознае надвор’е, прайшліся маршам па цэнтральных вуліцах Варшавы, ушанаваўшы памяць герояў Слуцкага паўстання. Арганізатарам акцыі выступіў лідар руху салідарнасці “Разам” Вячаслаў Сіўчык.

Шэсце пад бел-чырвона-белымі сцягамі пачалося з гімна “Пагоня”. У калоне, якая распачала марш ад варшаўскай колавай развязкі імя генерала дэ Голя, можна было ўбачыць партрэты лідараў беларускай апазіцыі Мікалая Статкевіча, Паўла Севярынца, Яўгена Афнагеля, палітвязняў Паліны Шарэнда-Панасюк, Рыгора Кастусёва, Анджэя Пачобута. Удзельнікі акцыі неслі транспаранты, прысвечаныя загінулым ва Украіне беларускім добраахвотнікам Эдуарду Лобаву, Васілю Парфянкову і Міраславу Лазоўскаму.

Беларусы скандавалі: “Жыве Беларусь!”, “Слава Україні!” і “Niech żyje Polska!” Калону суправаджалі музыкі – бубначы і дудары.

У нядзелю ў цэнтры Варшавы было шмат турыстаў з іншых еўрапейскіх краін. Яны актыўна цікавіліся тым, што за акцыя праходзіць у польскай сталіцы.

“Беларусы яшчэ змагаюцца? Вось гэта малайцы! Зычым вам перамогі”, – сказаў карэспандэнту Charter97.org паджылы турыст з Нямеччыны.

Потым мітынг працягнуўся на плошчы Каперніка, дзе кожную нядзелю праходзяць акцыі салідарнасці з Беларуссю.

Першым выступіў душпастыр беларусаў Варшавы, ксёндз Вячаслаў Барок:

– Хто яны, нашы беларускія героі? Яны нічым не адрозніваліся ад нас. У іх былі такія ж думкі, такія ж мары, такія ж слабасці, як і ў нас. У іх былі і свае памылкі. Аднак героі былі адметнымі людзьмі, бо ў найболей лёсавызначальныя моманты ў іх абуджалася сумленне.

Калі яны стаялі перад выбарам, каштоўнасцю для іх была Беларусь. За Беларусь яны былі гатовы пайсці на ўсё, нават ахвяраваць сваім жыццём. І ахвяравалі!

Потым вядоўцы акцыі зачыталі зварот старшыні Рады Беларускай народнай рэспублікі Івонкі Сурвілы:

– Дарагія беларусы! Так, як сёння ўкраінскія героі змагаюцца, каб выратаваць свой край ад нападу з Усходу, так у 1920 годзе 10 000 случакоў узялі зброю ў рукі, каб абараняць ад расейскай навалы Беларускую Народную Рэспубліку. Ніхто, на жаль, ім не дапамог. Не было ў іх нават зброі для кожнага змагара. Але нашыя героі амаль месяц стрымлівалі расейцаў.

Беларусы ва ўсім свабодным свеце дагэтуль кожны год адзначаюць гэтае гераічнае ўзброенае паўстанне сваіх суайчыннікаў са Слуцка. З удзячнасцю адзначае яго і Рада БНР – кожны год у канцы лістапада ўрачыста ўспамінае сваіх герояў і аддае ім павагу. Ад імя Рады БНР і ад сябе асабіста вітаю ўсіх, у каго баліць сэрца за герояў, якія пайшлі паміраць, каб жыла незалежная Беларуская Народная Рэспубліка. З захапленнем успамінаю вас, дарагія выпадкі, і дзякую вам за вашу мужнасць, вашу гераічнасць, а перш за ўсё – за вашу бязмежную любоў да сваёй зямлі і свайго народа. Жыве Беларусь!

Галоўны рэдактар польскай Gazety Wyborczej Адам Міхнік заклікаў усіх людзей добрай волі аб’яднацца для дапамогі Украіны, дзе сёння вызначаецца лёс і Беларусі, і Польшчы:

– Сёння мы ўсе – украінцы. Тое, што адбываецца ва Украіне, выклікае ўстурбаванасць, але і дае аптымізм.

Не будзе свабоднай Еўропы без свабоднай Украіны. Нашы краіны апынуцца пад пагрозай лакальных “пуцінаў”, “лукашэнак” і “януковічаў”. Таму ўсе разам давайце паўторым словы песні Булата Акуджавы – “Возьмемся за рукі, сябры”. Возьмемся за рукі беларусы, украінцы, палякі і расейцы, якія змагаюцца з Пуціным. Возьмемся за рукі і абаронім нашу свабоду!

Вядуоўцы акцыі зачыталі імёны слуцкіх паўстанцаў, якія загінулі за свабоду Беларусі.

Перад удзельнікамі акцыі таксама выступілі гісторык Андрэй Радаман, лідар руху салідарнасці “Разам” Вячаслаў Сіўчык і іншыя апазіцыйныя палітыкі.

Затым калона прайшла на замкавую плошчу, дзе прайшоў канцэрт, прысвечаны Дню беларускіх герояў.

Спампоўвайце і ўсталёўвайце мэсэнджар Telegram на свой смартфон або кампутар,

Categories: Гісторыя, Нацыя Беларусы