Улады нічога не зрабілі для вяртання беларусаў, якія выехалі. Затое 2025‑ы стане годам рэкорднага росту колькасці замежных работнікаў.

Да канца 2025 года Беларусь падышла з парадаксальнай сітуацыяй: афіцыйна — рэкордна нізкае беспрацоўе, неафіцыйна — востры кадравы голад. У дзяржаўным банку вакансій сёння каля 162 тысяч незакрытых пазіцый. Амаль усе буйныя прадпрыемствы, ад будоўлі да прамысловасці, прызнаюць недахоп людзей.

Працоўных рук бракуе паўсюдна, аднак найбольш востра сітуацыя адчуваецца ў Мінску і Мінскай вобласці — рэгіёнах з самай высокай канцэнтрацыяй прадпрыемстваў і самай моцнай канкурэнцыяй за персанал.

Кадравы разрыў фармаваўся не аднамомантна. Прычыны вядомыя: гэта і дэмаграфічны спад, характэрны для многіх краін Еўропы, але асабліва — палітычныя рэпрэсіі і выкліканы імі масавы ад’езд беларусаў пасля 2020 года (па розных ацэнках — некалькі сотняў тысяч чалавек). 

Да гэтага дадаўся яшчэ такі фактар як палітычна матываваныя звальненні і ціск на працаўнікоў, якія істотна ўзмацніліся пасля 2020 года. Тысячы спецыялістаў — ад настаўнікаў і медыкаў да інжынераў і дзеячаў мастацтва — пакідалі працоўныя месцы з-за трапляння ў «чорныя» і «шэрыя» спісы так званых нядобранадзейных.

Мігранты як новая норма: ад «пагрозы» да «рэсурсу»

Да 2022 года працоўная міграцыя ў Беларусі фактычна стрымлівалася: існавалі дазволы, праверкі, квоты, кантроль МУС. Але ў 2023—2024 гадах правілы рэзка спрасцілі: працадаўцам больш не трэба атрымліваць спецдазволы, пашыраны спіс прафесій для спрошчанага найму, замежныя выпускнікі беларускіх ВНУ атрымалі права працаўладкоўвацца без дадатковых бар’ераў.

У выніку бачым рэзкі рост:

• 2023 год: каля 13 тысяч замежных работнікаў;
• 2024: каля 34 тысяч;
• 2025 год (9 месяцаў): каля 32 тысяч.

Амаль палова ўсіх працоўных мігрантаў — грамадзяне Туркменістана і Узбекістана. Далей ідуць расіяне, кітайцы, украінцы, а таксама меншыя групы з Індыі, Непала, афрыканскіх краін.

Пакістанцы — насуперак гучным заявам — пакуль не ўваходзяць у топ-10 па колькасці.

Categories: Зьнешнія адносіны, Мараль, Этнацыд беларусаў